ವರದಿ: ರಾಮಸಮುದ್ರ ಎಸ್.ವೀರಭದ್ರಸ್ವಾಮಿ
ಚಾಮರಾಜನಗರ: ತಾಲೂಕಿನ ಚೆನ್ನಪ್ಪನಪುರ ಬಳಿಯ ಗುಡ್ಡದ ಶ್ರೀವೀರಭದ್ರೇಶ್ವರಸ್ವಾಮಿ ದೇವಸ್ಥಾನದಲ್ಲಿ ನಡೆದ ರಥೋತ್ಸವ ವೇಳೆ ಚಕ್ರ ಮುರಿದು ರಥ ಉರುಳಿ ಬಿದ್ದ ಘಟನೆ ನಡೆದಿದೆ.
ರಥೋತ್ಸವ ಹಿನ್ನೆಲೆಯಲ್ಲಿ ಸುತ್ತಮುತ್ತಲಿನ ಗ್ರಾಮಗಳ ಸಾವಿರಾರು ಜನರು ಭಾಗವಹಿಸಿದ್ದರು. ತೇರು ಎಳೆಯಲು ಚಾಲನೆ ನೀಡುತ್ತಿದ್ದಂತೆ ಭಕ್ತರು ಜಯಘೋಷದೊಂದಿಗೆ ತೇರು ಎಳೆಯಲು ಆರಂಭಿಸಿದಾಗ ತೇರಿನ ಮೇಲ್ಬಾಗ ದೇವಸ್ಥಾನದ ಗೋಪುರ ಕಡೆ ವಾಲಿದೆ. ಇದನ್ನು ಸರಿಪಡಿಸಲು ಮುಂದಾದ ವೇಳೆ ತೇರನ್ನು ಜೋರಾಗಿ ಎಳೆಯಲಾಗಿದೆ. ಪರಿಣಾಮ ತೇರಿನ ಒಂದು ಚಕ್ರ ಮುರಿದ ಪರಿಣಾಮ ತೇರು ಉರುಳಿ ಬಿದ್ದಿದೆ.
ಈ ವೇಳೆ ರಥೋತ್ಸವಕ್ಕೆ ಆಗಮಿಸಿದ್ದ ಸಾವಿರಾರು ಭಕ್ತರು ಚೆಲ್ಲಾಪಿಲ್ಲಿಯಾಗಿ ಓಡಿದರು. ಅದೃಷ್ಟವಶಾತ್ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ.
ಘಟನೆಯಿಂದ ರಥೋತ್ಸವದಲ್ಲಿ ಪಾಲ್ಗೊಳ್ಳಲು ಆಗಮಿಸಿದ್ದ ಸಾವಿರಾರು ಭಕ್ತರು ಬೆಚ್ಚಿ ಬಿದ್ದಿದ್ದಾರೆ. ಆದರೆ, ದೇವರ ಕೃಪೆಯಿಂದ ಯಾರಿಗೂ ಯಾವುದೇ ಹಾನಿಯಾಗಿಲ್ಲ. ರಥ ಹಳೆಯದಾಗಿದ್ದು ಅವಘಡಕ್ಕೆ ಕಾರಣ ಎನ್ನಲಾಗಿದೆ.
ರಥದ ಚಕ್ರ ಮುರಿದ ಹಿನ್ನೆಲೆಯಲ್ಲಿ ಭಕ್ತರು ನಿರಾಸೆಗೊಳಗಾಗಿದ್ದಾರೆ.