ಬೆಂಗಳೂರು: ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್ ಅವರಿಗೆ ಕೇಸರಿ ಶಾಲಿನ ಮಹತ್ವ ಗೊತ್ತಿಲ್ಲ ಅದಕ್ಕೆ ಮನ ಬಂದಂತೆ ಮಾತನಾಡುತ್ತಾರೆ ಎಂದು ಸಚಿವ ಈಶ್ವರಪ್ಪ ಕಿಡಿ ಕಾರಿದ್ದಾರೆ.
ಮಾಧ್ಯಮ ಪ್ರತಿ ನಿಧಿಗಳೊಂದಿಗೆ ಮಾತನಾಡಿದ ಅವರು ಕೇಸರಿ ಶಾಲು ಧರ್ಮವನ್ನು ರಕ್ಷಣೆ ಮಾಡುತ್ತದೆ ಎಂದು ಹೇಳಿದರು.
ಡಿ.ಕೆ.ಶಿವಕುಮಾರ್ ಹೇಳಿರುವಂತೆ ನಾವು 50 ಲಕ್ಷ ಕೇಸರಿ ಶಾಲುಗಳನ್ನು ಸೂರತ್ ನಿಂದ ತರಿಸಿಲ್ಲ ಅಯೋಧ್ಯೆಯಿಂದ ತರಿಸಿದ್ದೇವೆ ಎಂದು ಸ್ಪಷ್ಟಪಡಿಸಿದರು.
ಅಯೋಧ್ಯೆಯ ಶ್ರೀರಾಮ ಫ್ಯಾಕ್ಟರಿಗೆ ಆರ್ಡರ್ ಕೊಟ್ಟು ಹನುಮಾನ್ ಟ್ರಾವೆಲ್ಸ್ ಮೂಲಕ ಕೇಸರಿ ಶಾಲು ತರಿಸಿದ್ದೇವೆ ಎಂದು ವಿವರಿಸಿದರು.
ಕೇಸರಿ ಶಾಲುಗಳನ್ನು ನಾವು ವಿದ್ಯಾರ್ಥಿಗಳು ಮತ್ತಿತರರಿಗೆ ನೀಡಿದ್ದೇವೆ ಎಂದು ಹೇಳಿದರು.
ಕಲ್ಲು ಬಂಡೆಗಳನ್ನು ಒಡೆದು ಬೇರೆ,ಬೇರೆ ರಾಜ್ಯಗಳಿಗೆ ಕಳುಹಿಸುವ ಡಿ.ಕೆ.ಶಿವಕುಮಾರ್ ಗೆ ಕೇಸರಿ ಶಾಲು ಬಗ್ಗೆ ಮಾತನಾಡುವ ಯೋಗ್ಯತೆ ಇಲ್ಲ ಎಂದು ಈಶು ಟಾಂಗ್ ನೀಡಿದರು.
ಇದೇವೇಳೆ ಪ್ರತಿ ಪಕ್ಷದ ನಾಯಕ ಸಿದ್ದರಾಮಯ್ಯ ವಿರುದ್ದವೂ ವಾಗ್ದಾಳಿ ಮಾಡಿದ ಈಶ್ವರಪ್ಪ ಅಂದು ಕೇಸರಿ ಪೇಟ ಧರಿಸುವಾಗ ಅವರ ತಲೆಯಲ್ಲಿ ಏನು ಸಗಣಿ ತುಂಬಿತ್ತಾ ಎಂದು ತಿರುಗೇಟು ನೀಡಿದರು.
